什么治白癜风 https://m.39.net/pf/a_7568336.html 上海老底子每天呈送精彩文章一组
打开尘封的记忆，寻觅往昔的岁月
叙上海老底子事忆上海老底子人
诉上海老底子情
故里春秋
从新昌路讲起
作者：朱海洪
沪语改写：边秦翌
推荐：丁迪蒙
（一、二、三）
（四、五、六）
（七）
点击下方收听音频，时长8分32秒。
沪语讲述：顾天虹
新昌路浪最风光个人是张昌楣。
每日天大清老早，张昌楣就拿伊个搪瓷茶缸捧勒海从自家屋里向走出来，晃晃悠悠个从“三德里”来到新昌路浪。伊一边踱勒方步，一边嘴巴里勒哼《空城计》：
“我今在城楼观山景，耳听得城外乱纷纷……”
刚刚开了只个头，屁股后头立马跟得来一群小囡，朝牢仔张昌楣个背影一道哇啦哇啦个叫起来：“张昌楣、杨燕秋；张昌楣、神经病！”
搿歇想想真个是邪气勿好意思，我常庄也混勒搿帮子小囡里向瞎起哄。
张昌楣呢，像煞是啥也呒没听到一样，继续笃悠悠、慢吞吞个踱方步。伊走发走发，突然之间一只急转身、扑过来，吓得来搿眼小囡侪来煞勿及个逃。伊就回转身体照样摇头晃脑个踱方步。等到伊开始得意忘形个辰光，搿眼小囡又邪气小心个围拢起来，有开始哇啦啦啦叫了：“张昌楣、杨燕秋；张昌楣、神经病”。
张昌楣回过头来，朝伊拉笑笑，还是笃悠悠介个朝前头走。小囡是越跟越多勒呀，乃末，张昌楣又勒末生头转过身来，手臂把一伸，拨伊捉牢了一个，顶顶要命个是，呆呆叫拨伊捉牢个就是我个手。
“侬，叫啥个名字啊？”伊拿只嘻皮塌脸个面孔贴过来，我是吓得魂灵头也呒没了。想用力拿只手抽回来，但是，就像是拨老虎钳夹牢了一样，随便哪能也动勿了。
“伊叫啥个名字啊？”看到我要哭出来个样子，伊就问旁边个人了。
“伊啊，伊叫海洪。”有人回答伊。
“海洪？噢，海～洪，海～呃洪！哈哈哈哈哈哈！”张昌楣头往上抬起来，穷笑八笑。突然，伊又压低声音问我：“杨燕秋，是侬个班主任伐？”
“勿是，勿是个。”我快点摇摇头。
“勿是个？噢！”伊拿我个手松开来，眼神就像只蜡烛一样，亮了一记又暗下去了。
“嘀-铃-铃-铃-铃”！学堂里向个上课铃声一记头响起来了，张昌楣屁股后头个“小尾巴”呼一记，好像侪拨铃声吸进去了，周围一个人也呒没了。
路旁边个学堂是我小辰光个母校——新昌路第一小学，跟勒张昌楣屁股后头个小囡侪是“一小”个学生仔。小朋友乱叫八叫，是因为伊拉实在气勿过，张昌楣，迭个像告花子一样个人居然看上杨燕秋老师了，葛哪能来三呢？
新昌路小学原址现为：好小囡幼儿园
杨燕秋，是“一小”个老师，邪气漂亮个，长得蛮长个，高挑玉立，走起路来呢，就像风吹柳条，张昌楣哪能可以看上杨燕秋个呢？小朋友拉实在是想勿通呀。所以呢，只要一看到张昌楣，搿眼“一小”个学生仔侪必定要跟勒伊个屁股后头乱叫八叫。
张昌楣，一个三十几岁个男人，看上去有眼邋里邋遢，但是其实仔细看看伊，相貌还是相当勿错个。一张四方个国字面孔，大背头，头发又黑又浓，油光光个，浓眉毛，鼻梁浪向戴副黄渣渣个近视眼镜，鼻头有眼勾，嘴唇皮薄薄个，下巴阔中收尖，有眼大知识分子个腔调。只可惜伊个面色是青白个，一年到头穿仔双后跟也烂脱个布鞋，指掐呢，是又长又黄，走起路来，有点呴背，昂好仔头一伸一伸，一副穷酸个文人相。
张昌楣书读到高中毕业，假使勒科举时代，就算是个举人了。本来应该有蛮好个前程个，可惜勒勒读书辰光失恋，发神经了，就开始混日脚，最后混到只好靠救济，伊整天勒勒新昌路浪向东荡荡西荡荡。
荡来荡去，伊勒勒学堂门口看到了杨燕秋了，哦呦，乃末眼睛看花脱唻，神智无知唻，拿伊久违个原始情感挑动起来了呀。但是啊，因为自家介潦倒，实在觉着惭愧，只好勒勒心里向单相思。伊只要看到“一小”个学生，就常庄要屏勿牢，要拉牢仔伊拉问问杨燕秋个事体，搿能介，再引起搿眼小囡个大呼小叫。
小囡拨学堂个铃声吸走了，张昌楣就捧牢仔茶缸朝“广泰”走过去。过马路个辰光，伊从地浪向捡起一截还烊勒海个香烟屁股，叼到嘴巴浪，“吱”猛吸一口。“广泰”前头有得烟客看到伊，就喊：“张昌楣，香烟屁股勿要了，来支飞马，讲故事好伐”。
（八）
点击下方收听音频，时长9分05秒。
沪语讲述：王宇洲
张昌楣接过“飞马”，摆勒鼻头下头闻闻，又凑到眼门前瞄瞄，往耳朵高头一夹：“讲啥个故事啊？”“讲侠盗亚森罗平。”张昌楣清清喉咙，开始有声有色个讲起了亚森罗平哪能介智斗福尔摩斯个故事了。
“亚森罗平搭仔福尔摩斯斗，到底是啥人个本事大呢”，听客开始惹伊了。“当然是亚森罗平本事大咾”，张昌楣一面孔个勿屑。“福尔摩斯是神探，破案子从来也呒没失败过，哪能会得败拨亚森罗平个呢？”张昌楣从袋袋里向摸出书，晃一晃，讲：“书浪向写个”！
有人存心勿服气，推开伊个书。张昌楣就穷争八争，争得来面孔通通红，呒没啥个结果。到最后，伊只好摇摇头：“孺子不可教也！”捧好仔茶缸走脱了。
店门口一片轰堂大笑。
闲话讲得忒多，肚皮有眼饿了，张昌楣直接走到马路对过，到大饼摊头：“小百叶，来两只大饼”。伊抖抖豁豁个从袋袋里向摸出六分洋钿送过去。
“小百叶”接过张昌楣个六分洋钿，拨了伊两只。刚刚出炉个大饼呼呼热，张昌楣豪扫拿茶缸放脱，接过大饼，用两只手倒来倒去，一面倒，嘴巴里一面还要嘘气。最后，伊拿大饼往中山装个大袋袋里向一塞，拎起茶缸，转身弯到了“三德里”。
“三德里”是一条弹硌路弄堂，邪气狭个，蜿蜿蜒蜒个像条羊肠。走到弄堂一半个位置，勒左手边有条横弄堂，口口头邪气气派，立勒只拱形个匾，匾浪向可以隐隐约约看到“京兆西里”四个大字。“京兆”嘛，肯定就是京城个古称咾，历史浪向有“京兆尹”搿能个官职个，相当于搿歇个北京市长唻。迭条弄堂既然敢用“京兆”来命名，绝对勿是普通人家，听说搿搭曾经住过不少大人家个。“京兆西里”其实是“京兆里”个支弄堂，伊就像顶桥，拿“京兆里”搭仔“三德里”贯通起来了。
“京兆里”个堂口是勒勒新昌路浪个。民国七年，也就是年，大家闺秀俞文耀拿“京兆里”改成了“坤范女子中学”，专门培养女教师，搿搭个人侪叫伊“坤范”。后首来，“坤范”变成功“新昌路第一小学”。小学里向也勿太平，东翻西拆，从礼堂个古戏台下头挖出来一块牌匾，匾高头个字吓人一跳：“周瑜顺风庙”，原来，搿块宝地是三国时期东吴遗留下来个古迹啊。
一切侪是过眼云烟。搿歇，“京兆里”呒没了；“京兆西里”也灰溜溜了，越来越破落，堂口边浪搿只龌龊兮兮个水泥垃圾箱就是证明。
张昌楣走到“京兆西里”，好像想起了啥个事体，手脚邪气快个爬到垃圾箱高头，朝墙壁浪个玻璃窗里张。窗子里向就是“一小”，张昌楣想看个，当然是杨燕秋咾，想看看伊哪能介上课。
人间个情事稀奇古怪，好端端个一个芳名去挂勒一个莫名其妙个男人后头，拨学生仔勒大庭广众乱叫八叫，杨燕秋老师心里向一定勿大适意个。但是我从杨老师个面孔浪向，一眼也看勿出有啥个风生水起。伊像呒没搿桩事体一样，笃笃定定讲闲话，勿快勿慢个走路。大概，伊自家根本就勿晓得伐！我想。实际浪，真个也希望伊勿要晓得，还希望伊是我个班主任，但是伊勿是。伊只必过是“一小”其他班级个年轻女老师。
张昌楣勒“京兆西里”停了停，然后又继续往西走。熟人侪晓得个，伊其实是要去做一桩事体——孵茶馆。
老上海人侪欢喜孵茶馆个，因为茶馆是有闲一族休息个风水宝地。
上海个茶馆勒勒宋末元初就有了，到清末同治初年辰光，茶馆开得越来越多，生意也越来越好了。最早一爿有得名号个茶馆叫“丽水台”，开勒租界个三茅阁桥旁边，推开窗门就好看到洋泾浜。第二爿茶馆叫“一洞天”，开了南京路浪个。年，广东人又勒勒棋盘街开了“同芳茶居”。勿久之后，老城厢就有了“湖心亭茶室”、“也有轩”、“四美轩”搭仔“春风得意楼”咾啥。再后首来，茶馆从南市往北市发展，又有了云南路个“鹤林春”、广东路个“松风阁”、福州路个“青莲阁”，九江路个“天香阁”、南京路个“仝羽春”、“五云日升楼”咾啥。
湖心亭茶楼与木质九曲桥
福州路上的“一层楼”茶楼
明信片中的旧上海南京路全安茶居
开在四川路上的广东茶楼
四川北路虬江路第一家“新雅茶室”
贺友直笔下的老上海茶馆
到了宣统元年，上海已经有得64家茶馆；十年之后增加到家了。
（九）
点击下方收听音频，时长8分44秒。
沪语讲述：王幼兰
老底子，茶馆可以分广帮、苏帮、本帮。广帮个特点是早茶，就是“一盅两件”。一盅当然就是茶咾，两件么，就是两只小点心：叉烧包、蒸凤爪；
苏帮茶馆妙勒有得评弹好听。“当嗰哩嗰当，哩嗰哩嗰当”，二郎腿翘翘，瓜子吃吃，茶吃吃，，邪气适意个；
本帮茶馆呢，特别实惠。天一亮就开门，老板只管自家生火烧水，茶客只管坐勒海谈山海经。开张了，堂倌潇洒个拿水灌到杯子里去，考究眼个，茶泡勒有盖头个杯子里，高头摆只橄榄；到了新年新岁，还摆只金橘，搿是店家个一番好意。
勿同个茶馆，规模大小也是勿一样个。
大个，像四马路“青莲阁”，三层楼，五、六开间门面；南京路“五云日升楼”，两层楼，四、五开间门面。
年代的青莲阁茶楼
青莲阁前楼卖茶，后楼卖鸦片烟，热闹非凡
中等茶馆，一个层面，一般两三开间门面；假使是单开间门面，葛末楼浪楼下个也勿少。
小茶馆可以小到“老虎灶”样子，肯定是最最实惠个，一杯茶几分洋钿，随便侬坐。茶客呢，基本浪侪是街坊邻舍，瓜子吃吃、八卦聊聊、新闻讲讲、玩笑开开，直到野狐禅个乱说大书。老虎灶茶馆遍布上海滩个角角落落。
最最勿起眼个袖珍老虎灶，呒没茶馆可以孵，只好泡泡开水、汏汏盆汤。五、六十年代，新昌路“广泰”烟纸店边浪就有得一家。面对马路个灶台浪砌一只炮筒水箱供应开水，边浪拉块帘子，后头摆只脚盆，供浴客汏浴，俗称“卖盆汤”。
我小辰光去泡过开水，一分洋钿一热水瓶。老板蛮瘦个，一直笑眯眯个，只要冷风吹起来，伊个头浪向肯定会得戴顶碗型个绒线帽。看到张昌楣捧牢仔茶缸晃发晃发过来了，老板还常庄会得搭伊开两句玩笑，张昌楣就趁机借光接眼开水。假使搿家老虎灶还兼营茶馆，张昌楣也就勿至于跑到其他地方去孵茶馆了。
听人家讲张昌楣常庄勒勒茶馆说大书，我邪气好奇，特特为为到“长兴馆”书场去寻伊。“长兴馆”勒勒黄河路明星大戏院笡对过，只有一开间门面，说书勒楼浪。有日夜到，趁看门个勿注意我溜上去，想看看张昌楣是勿是勒勒搿搭说书。从路梯上到二楼，朝里向望过去，只看到靠墙说书个台子边头，一个长衫先生正好勒拍惊堂木、手舞足蹈讲得起劲，下头摆勒几排长凳，大家朝老老认真个听书，并呒没张昌楣个影子。
后首来我再晓得，张昌楣是从“三德里”穿过去个，伊其实是到成都北路去孵茶馆、说大书个。
成都北路，有眼特别个，伊是条区界线。路东属于黄浦区，路西就是静安区了，老底子还叫新成区。成都北路横穿山海关路菜场，所以来来往往人是邪气多个。
成都北路浪最叫得响个，是勒勒北京西路转弯角子浪个“新长发”。迭是一家老字号，发源于上个世纪三十年代。
年新长发旧影（石门二路号）
年，上海人钱富生夫妻勒北京路浪开了爿“新发兴果品店”，因为经营勿善倒闭脱了。伊拉勿甘心，就开始研制桂花糖炒栗子。到了年，钱富生拿“新发兴”改名叫“新长发”，除脱仔水果，还卖桂花糖炒栗子。伊个栗子因“规整、甜美”而一炮打响了。后首来，钱富生为独生囡儿搭仔女婿勒成都北路、延安中路浪又开出了“新长发”分店。“青出于蓝胜于蓝”，分店个桂花糖炒栗子外观溜溜圆个，色、香、味样样侪好，因此吸引了勿少顾客，伊拉侪是到附近光华大戏院、九星戏院、金门大戏院、巴黎大戏院、国泰电影院以及舞厅咾啥去看戏、白相个。秋冬时节，交交关关个人勒看戏或者散步个辰光，随手买袋热乎乎个糖炒栗子剥来吃吃。甜美香糯，口口相传，“新长发”栗子大王从此名扬上海滩了。
“新长发”附近还有眼名气个就是“富春茶楼”搭仔“富春书场”了。看上去是同名个“富春”，但实际浪，茶楼是茶楼，书场是书场，“桥归桥路归路”，吃茶、说书两勿干扰，是比较正规个。勿象张昌楣，孵勒老虎灶里吃吃茶、吹吹牛、说说书，侪混勒一道，搞勿清爽。
（未完待续）
原标题：《故里春秋——从新昌路讲起（7-9）》
